Directions
Прекрасни, тенки, меки и вкусни палачинки од тесто со мазна структура, кои нема да ви горат и не се лепат.
Лесни и едноставни за подготовка, со вистински освежителен вкус кој го добиваат од јогуртот.
Можете да ги подготвите како блага или солена варијанта со фил по ваш избор.
Овие палачинки дефинитивно ќе ги обожаваат вашите гости и најблиски.
Состојки:
- 2 јајца
- 3 лажици брашно
- 1 шоља јогурт (350 мл)
- 2 лажици масло
- прстофат сол
- ванила екстракт
Подготовка на тестото:
- Во подлабок сад ставете ги јајцата и додадете прстофат сол. Со маталка изматете кратко за да се изедначат жолчките со белките.
- Додадете го јогуртот, маслото и ванила екстрактот и измешајте ги состојките.
- На крајот додадете три полни лажици брашно. Можете да пробате со две лажици и да додадете уште по потреба, зависно од густината на јогуртот и големината на јајцата.
- Оставете го тестото во фрижидер 15 минути пред печење.
- Премачкајте ја тавата со малку масло и вишокот отстранете го со кујнска хартија.
Печење:
- Печете на средна температура околу 2 минути.
- Штом се готови од едната страна, свртете ги и печете уште 20 секунди.
Предлог за фил:
Јас како љубител на овошни вкусови препорачувам едноставен фил со џем од кајсија и сецкани парчиња кајсија. Поросете со прав шеќер и уживајте во слаткото задоволство!
Имајте добар апетит! 
