Directions
Традиционален вкус, природна сладост и многу здравје во една тегла.
Домашниот џем од шипки е богат со витамини, антиоксиданти и природна арома што не може да се спореди со купечките варијанти.
Овој џем има длабока рубин-црвена боја, нежна текстура и вкус кој веднаш буди спомени на дом и топлина.
Подготовката бара време и трпение, но наградата од 7–8 тегли е чисто совршенство — за кое навистина вреди секоја минута.
___________________________________________________________________________________
Состојки
3 кг зрели шипки
2 кг шеќер
Вода по потреба
Подготовка
Чистење и варење на шипките
1. Отстранете го црниот врв како капа од секоја шипка и добро измијте ги.
2. Ставете ги во големо тенџере и прелијте ги со вода — да ги покрие 5 см над шипките.
3. Варете ги 30-40 минути од моментот кога ќе зовријат за убаво да омекнат
Пасирање и цедење
1. Изварените шипки испасирајте ги со рачен блендер.
2. Додавајте малку вода по потреба за да се добие полесно пире за цедење.
3. Процедете го пирето низ цедалка или газа за да биде свиленкасто-мазно
4. Треба да добиете приближно 4-5 литри густо, мазно пире.
Варење на пирето
1. Ставете го пирето назад на среден оган и загрејте до вриење.
2. Постојано мешајте за да не загори.
3. Отстранете ја пената што се појавува на површината.
4. Од моментот на вриење варете околу 40-60 минути на среден оган, зависно од количината на водата, притоа постојано мешајќи за да не ви загори
Додавање шеќер
1. Додајте 2 кг шеќер пред самиот крај
2. Мешајте додека целосно не се растопи.
3. Варете уште 10 минути пред да го тргнете од оган
4. Џемот треба да остане светло-црвен и да не потемни.
5. Густината проверете ја со лажичка на студена тацна — ако остави траг, готов е.
Имајте на ум дека иако е течен со ладење дополнително ќе се згусне.
Стерилизација и полнење тегли
1. Теглите добро измијте ги и исушете ги во рерна на 100°C околу 15 минути.
2. Во топли тегли сипете топол џем.
3. Веднаш затворете и оставете ги да се оладат на собна температура.
Уживање и Дегустација
Овој џем е совршен за појадок: на топол леб со путер, со чај од шипки или со свежо печени палачинки. Богата боја, чист вкус и домашна љубов во секоја лажичка — трудот навистина се исплати.
