Торта со ореви и свилен крем од кафе

Share

(Лесна, мирисна и совршена со шолја кафе)

Ако сте љубители на филови збогатени со кафе, тогаш оваа торта со богат вкус на ореви сигурно ќе ви се допадне.

Мекото пандишпан тесто и буквално свиленкастиот крем со вкус на кафе создаваат неодоливо слатко уживање, совршено со шолја кафе по ручек.

Тортата се подготвува лесно и брзо, со состојки кои најчесто ги имаме дома, што ја прави чест гостин на мојата трпеза и одличен избор за неочекувани гости.

Една од причините зошто особено ја сакам оваа торта, покрај вкусот, е тоа што може да се замрзне. Може да се сечат парчиња по потреба и да се сервира како ладен десерт — ровкото тесто брзо се одмрзнува, а ладна е навистина вкусна.

Состојки за тесто

• 4 јајца
• 70 мл полномасно млеко
• 50 мл сончогледово масло
• 120 г брашно
• 20 г кафе
• 1 лажица ванила екстракт
• 10 г пециво
• 130 г шеќер
• Прстофат сол
• 50 г сецкани ореви (по желба, може и мелени)

Подготовка на тестото

1. Одделете ги белките од жолчките и во белките додајте прстофат сол.
2. Матете кратко, па постепено додавајте го шеќерот во три наврати, додека да добиете убав волумен.
3. Додавајте ги жолчките една по една и матете до изедначување.
4. Додајте го млекото, маслото и ванила екстрактот.
5. Во брашното додајте го пецивото и кафето, просејте и додајте ги во смесата.
6. На крај, по желба, додајте сецкани ореви и нежно измешајте со шпатула.
   

Тавата (26 см) премачкајте ја со масло и набрашнете ја или обложете ја со хартија за печење. Истурете ја смесата и печете на 170°C околу 25 минути.

Проверете со чепкалка дали тестото е испечено и оставете го да се излади додека го подготвувате кремот.

Состојки за крем од кафе

• 2 жолчки
• 90 г шеќер
• 60 мл сварено инстант кафе (изладено)
• 1 лажичка нишесте
• 80 г путер (на собна температура)
• 1 лажица ванила екстракт
• 100 г сецкани ореви за декорација

Подготовка на кремот

1. Жолчките изматете ги кратко со шеќерот.
2. Додајте 2 лажици од кафето, па нишестето и остатокот од кафето.
3. Смесата матете ја на пареа околу 5 минути, па тргнете ја да се олади.
4. Путерот изматете го пенесто, па постепено додавајте го оладениот крем од кафе.
5. Матете додека да добиете свилен, мазен крем со богат мирис на кафе.

Премачкајте ја тортата со кремот и посипете со сецкани ореви.

Имајте добар апетит!