🥖Меки чиабата лепчиња со предферментација

Share

(Лесни, мирисни и лесни за варење)

Меки и воздушести чиабата лепчиња со тенка кора и прекрасен мирис, идеални за појадок или ручек во многу различни комбинации. Благодарение на методот на предферментација, овие лепчиња се лесни за варење и нежни за желудникот.

Начинот на подготовка на лебот е клучен за неговиот квалитет. Малата количина на квасец и бавното ферментирање придонесуваат за подобра текстура, подлабок вкус и полесна дигестија.

Ако направиме споредба со начинот на кој моите баби подготвувале леб, ќе забележиме дека денес многу здрави навики се изгубени. Иако квалитетот на брашното можеби не е ист како порано, начинот на подготовка зависи од нас — и токму таму можеме да направиме разлика.

Во последните години свесно подготвувам поздрав леб кој бара повеќе време, но резултатот е неспоредливо подобар за здравјето и вкусот. Оваа страница е создадена за да го споделам тоа искуство со вас.

За методот на предферментација

Овој метод се разликува од стартерот по тоа што користи многу мала количина квасец, комбиниран со брашно и вода, кој бавно ферментира 12–16 часа.

Со тоа се добива:

• Подобра текстура
• Подлабок вкус
• Полесна дигестија

Доволно е еднаш да го подготвите лебот на овој начин за да ја почувствувате разликата.

Состојки

• 500 г брашно
• 400 мл ладна вода
• 1 г сув квасец
• 8 г сол (1 лажичка)

Подготовка

Предферментација (ден 1)

1. Во сад измешајте 200 г брашно, 1 г сув квасец и 200 мл ладна вода.
2. Покријте со пластична фолија и оставете во фрижидер 2–16 часа или преку ноќ.

Тесто (ден 2)
3. Во 200 мл ладна вода растворете 8 г сол.
4. Додадете ја во ферментираното тесто и измешајте.
5. Додадете ги преостанатите 300 г брашно и месете неколку минути.

• Тестото е лепливо поради високата хидрација — не додавајте дополнително брашно.

6. Префрлете во намастен сад, премачкајте и одозгора, покријте и оставете 45 минути на собна температура.

Преклопување
7. Со навлажнети раце преклопете го тестото четири пати.
8. Повторете ја постапката уште два пати, на секои 45 минути (вкупно 3 пати).

Формирање
9. Превртете го тестото на површина набрашнета со пченкарно или гриз брашно.
10. Поделете на 4 или 6 лепчиња.
11. Наредете ги во тава, покријте со крпа и оставете да одморат 20 минути.

Печење

• Загрејте ја рерната на 220°C со сад со вода под решетката, најмалку 15 минути пред печење.
• Печете до златно-кафеава боја.
• Во пица-фурна: загрејте на 300–350°C и печете околу 2 минути.

Идеи за сервирање

Овие лепчиња се одлични:

• како ладен сендвич со ајвар, мортадела, кајмак и зелена салата
• малку потпечени со топли кебапи и сецкан кромид

Рецептите може да ги најдете во линковите подолу.

Имајте добар апетит!

Ќебап! Мој омилен Рецепт !

Чиабата Сендвич со мартадела и кајмак!