Directions
Летна Езготична салата која изобилува со бои и вкусови кои неверојатно се вклопуваат и надополнуваат.
Шаренило од бои и вкусови кое може да го подготвите за 5 минути, или да им оставите прилика да ја подготват вашите гости и заедно да уживате од подготовка до дегустација.
Оваа бурата салата е инспирирана од мојата последна посета на Абу Даби, започнувајќи од начинот на сервирање кој ме воодушеви, па се до комбинацијата на овошјето со зелени салати, вкусовите и шареноликоста, повеќе причини за да биде на врвот на најпродавани во ресторанот во кој ја пробав. 
Со задоволство ја споделувам во сезона на свежа малина и шери домати.
По избор може да користите микс од зелени салати а колку повеќе боја имате толку подобро.
Бурата сирењето кое се состои од моцарела сирење надворешно и е наполнето со страчатела одвнатре, одлично ја збогатува оваа салата, додека тостираните лепчиња во тава со масло ја прават вистинско крцкаво задоволство. 
Италијанската бурата е најпозната, но само како информација е дека буратата е и македонски бренд, која се подготвува и кај нас, а многумина ќе кажат дека дури е и повкусна од италијанската.
Но за вкусови не се дискутира понекогаш, и затоа оставам на вас да одберете која вас ви одговара повеќе.
Ова сирење може да го најдете во повеќе маркети и месари како мала и голема бурата.
Содржи многу протеини и освен што е здрава и пресна, е одлична во комбинација и со многу јадења. 
Состојки за 2 лица
250 грама микс од шарена зелена салата
80 грама шери домати (половинки)
50 грама свежи малини
1/2 Манго (тенки парчиња)
1 Бурата
4 парчиња тостиран леб
За дресинг (прелив)
2 л. балсамиков оцет
2 л. маслиново масло
2л. лимонов сок
4 малини
Зелената салата и малините измијте ги под млаз ладна вода, користете свежи малини. Шери доматите исецкајте ги на половинки и мангото на текни парчиња по должина.
Подгответе поголема чинија за сервирање. Најпрвин распоредете ја зелената салата на дното и врз неа по избор распоредете го исецканото овошје.
На крајот, во средина додадете ја буратата. Таа се чува во течност и пред да ја додадете исцедете ја од течноста во која се чува. 
Подгответе го преливот и посипете. Малините може да ги испасирате со вилушка и во нив да ги додадате другите состојки. Измешајте и рамномерно прелијте од преливот.
Тостираните лепчиња се подготвуваат лесно и брзо. Најдобро е да користите багет и да го исецкате на тенки парчиња.
Секое парче од двете страни додадете му маслиново масло, малку сол и бибер и потпечете ги кратко во тава додека да добијат златно-кафеава боја и да станат крцкави. 
Засечете ја буратата на средина со нож или едноставно отворете ја со раце.
Може да макате со лепчето од неа, или да нанесете на крцкавото лепче од буратата и да уживате во вкусовите како милувате.
Имајте добар апетит! На здравје!
