Directions
Лесна чорба со леќа, богата со протеин, хранлива и вкусна, збогатена со мелено месо и тарана која може да ја подготвите за половина час.
Оваа чорба е традиционален рецепт кој мајка ми го подготвува многу често, и е една од омилените чорби на сестра ми. Понекогаш ја подготвувам и без тарана, само леќа и месо, или по желба може да ја спремите и посна само со леќа.
Одличен оброк во било кој дел од денот, заситува бидејќи е богата со протеини, надополнета со јаглени хидрати од тараната.
Рецептот како да подготвите домашна и вкусна тарана по рецепт на баба ми веќе е споделен на страната, а линкот може да го следите на крајот од овој пост.
Најчесто вкусот на оваа чорба го сакам збогатен со повеќе зачини што ја прави богата и особено може да ви помогне во период на грип и настинки. Може да ја подготвите и без месо по избор, ако ја подготвувате со месо, одберете парче меко месо и смелете го еднаш. По вкус може да подготвите со јунешко или свинско мелено месо.
Состојки
150 гр. леќа
100 гр. тарана
300-400 грама мелено месо (јунешко/свинско)
1/2 главица кромид
2 чешниња лукче
1 домат ситно сецкан
1 морков ситно сецкан
2 лажички црвена пиперка
зачини по вкус (црн бибер, мускатно оревче, сув магдонос, сув целер, куркума, кари, ѓумбир во прав)
свежа мајчина душичка
3 листа ловоров лист
3 лажици маслиново масло
1 лажица брашно
сол по вкус
Во тава додадете маслиново масло и додадете половина главица ситно исецкан кромид да се испржи на тивок оган додека да стане проѕирен.
Потоа додадете го меленото месо и мелен црн бибер. Откако убаво ќе се испржи месото додадете го исецканиот домат. Пржете уште неколку минути додека да испари сокот и додадете зачини по вкус и сецкано лукче. Испржете кратко. Леќата измијте ја во неколку води и додадете ја заедно со тараната. Пржете уште неколку минути и на крајот додадете сецкан морков, црвена пиперка и сол по вкус и запржете кратко.
Прелијте со 1 литар вода, додадете го ловоровиот лист и оставете да се вари 30 минути на среден оган. По потреба и во зависност од густината која ја сакате може да додадете вода дополнително.
На крајот во тава запржете кратко една лажица брашно со малку масло и додадете една лажичка црвена пиперка. Пржете кратко, внимавајте да не ви загори црвената пиперка и додадете од течност од чорбата, мешајте постојано на умерена температура за да нема грутки. Додадете ја запршката во топлата чорба и варете уште пет до десет минути.
Ако имате свежа мајчина душичка исчистете неколку гранчиња, додадете на крајот и тргнете ја чорбата од оган. Оставете ја неколку минути покриена пред да ја сервирате.
Имајте добар апетит!
Како да подготвите домашна тарана следете во линкот подолу :
