Directions
Ајварита – пица со ајвар инспирирана од наполетанската пица Маргарита
Ајварита е уникатна пица, со вкус и арома на димена пиперка, едноставна, која дефинитивно заслужува да ја испробате во сезоната на ајвар.
Како настана Ајварита?
Идејата ми се роди случајно при подготовка на наполетанска пица, и тукушто завршениот ајвар за оваа сезона решив да го додадам во пицата.
Доматниот сос целосно го заменив и основата се решив да биде само ајвар. Моцарела сирењето и пармезанот ги задржав, а додадов и малку свежа црвена ајварска пиперка бидејќи имав дома.
И додека ја подготвував ми пројде името Ајварита во мислите, па да, зошто да не, скратено од маргарита, заменето со ајвар.
Зошто да не биде и нова варијанта на италијанска наполетанска пица прилагодена на македонски начин?
И така бидна нешто ново и уникатно, па на тоа се додаде и македонско девојче инструментална верзија, и видеото за оваа пица ме освои од прва. Ова кратко видео може да го погледнете на профилите на инстаграм и фејсбук. 
Топло ви ја препорачувам, и еве додека го пишувам текстот уште едно име се роди во мислите, Ајварита – Македонита како втора варијанта која го надополнува Ајварита.
Ајварот како автентичен македонски бренд нека биде причина за да го подновиме и во ново руво да го гледаме како намаз на нешто што може да биде широко распространето.
Може ќе се согласите со мене, може не, но еве овој рецепт и текст нека сведочат за една инспирација и идеја која може и вас да ви роди инспирација за нешто поинакво.
Состојки за две пици
наполетанско тесто за 2 пици (250-280 грама за една пица)
250 гр моцарела
6 лажици ајвар
1 свежа ајварска пиперка
3 лажици рендан пармезан
свеж босилок ливчиња
маслиново масло
Растегнатото тесто премачкајте го со ајвар, секоја пица по 3 лажици. Потоа додадете парчиња 125 грама моцарела за една пица и распоредете свежо сецкани парчиња црвена ајварска пиперка. Изрендајте пармезан сирење и печете во загреана фурна.
На крајот прелијте по краевите на тестото малку маслиново масло и додадете свежи ливчиња босилок за вкус и декорација.
Имајте добар апетит!
Во продолжение може да го следите линкот за рецептот за автентичен македонски ајвар кој го подготвувам многу години!
