Крцкави Домашни Лебчиња!

Започнете со активирање на квасецот.
Во млака вода на температура не повеќе од 40 степени, додадете една лажица шеќер во зрно ( 6 грама) и промешајте да се растопи.
Во водата додадете го сувиот квасец (4 грама) или двојно повеќе ако користите свеж квасец.
Оставете десет минути да се растопи и активира квасецот.
Во меѓувреме просејте го брашното да биде растресито и во него додадете лажица сол (8 грама).
Измешајте да се соединат брашното и солта.
После десет минути откако е активен квасецот додадете го во сад во кој ќе го приготвувате тестото и додавајте го брашното со лажица една по една, не наеднаш. Откако ќе го додадете целото брашно тестото оставете го на 1 (единица) да се меси со миксер десет минути. Првите пет минути на најмала брзина, вторите пет минути на втора брзина. Или месете го тестото со раце десет минути.
На крајот тестото ќе биде лепливо и мазно. На набрашнета површина обликувајте го кратко тестото во топка, премачкајте го со масло и ставете го во стаклен сад. Покријте го со фолија и оставете го на топла собна температура да стои еден час. Тестото за еден час ќе нарасне повеќе од двојно.

После еден час откако ќе нарасне тестото двојно, размесете го повторно во топка и вратете го во истиот сад да стасува уште триесет минути.
На набрашнета површина поделете го тестото по второто нараснување на 6 еднакви дела.
Нараснатото тесто треба да биде околу 850 грама или секое мало парче околу 140 грама.
Секое мало парче обликувајте го со рака во топка и набрашнете го одозгора.
Откако ќе ги обликувате сите шест парчиња, оставете ги на работната маса, покријте ги со крпа и оставете ги да одморат пет до десет минути.
После десет минути секое топче притиснете го на средина и придвижете напред назад за финално да го обликувате и издолжите во мала ролна. За полесно да ги обликувате можете да ги погледнете видеата објавени на профилите на Instagram или Facebook.
На премачкана тава со маст или масло редете го секое лепче на косо и оставајте простор да не се допираат при печењето.
На крајот откако ќе ги наредите во тавата покријте ги со крпа и оставете да отстојат дваесет до триесет минути, во зависност од собната температура. Најдобро е да бидат на температура околу 25 степени за кои се доволни 20 минути.
Во меѓувреме подгответе ја рерната и вклучете ја на 220 степени, а внатре ставете сад со вода.
Додека се печат лепчињата тоа ќе им помогне за покрцкава кора.
Пред печење исечете ги со остар нож на средина лепчињата по должина и печете ги 15 до 20 минути, во зависност колку сакате да бидат темни.
Пред печење во рерна може да ги испрскате лепчињата со вода.
Одлични со путер или ајвар!
На здравје!
Споделете и лајкнете доколку ви се допаѓаат овие топли лепчиња :)