Directions
Дали сте за здрава и нутритивна порција богата со протеини и зеленчук, надополнета со ориз на сириски начин? Овој комплетен и здрав оброк инспириран од медитеранот ќе ве засити благодарение на тоа што изобилува со многу нутритивни вредности кои му се потребни на целиот организам.
Подготовката на оризот е едноставна и брза, а најдобро е да користите басмати ориз. Подготовката на ориз на сириски начин е уникатна бидејќи во составот вклучува фиде, а за да биде воздушест оризот и зрното цело потребна е доволна количина на вода и да обрнете внимание на некои детали во спремањето.
Целосната подготовка на ориз на сириски начин може да ја побарте во посебен пост на страната.
За подготовка на овој оброк ви е потребна боранија по избор, зелена или жолта, телешко или јунешко месо кое најдобро е да биде тенко сецкано на мали парчиња, доматен сос и зачини.
Се подготвува брзо и лесно без да ви одзема многу време.
Започнете со подготовка на сосот од месо и боранија, а оризот подгответе го на крај.
Состојки за Сосот
500 грама месо (јунешко/телешко, тенко сецкано на мали парчиња)
300 грама боранија (замрзната)
150 грама доматен сос
зачини по вкус (мелен бибер, црвена пиперка, кари, куркума, ловоров лист)
маслиново масло
4 чешниња лук
1/2 главица кромид
Исецкајте го ситно кромидот и на тивок оган испржете го додека да омекне и стане проѕирен. Потоа додадете го исецканото лукче и кратко испржете го. Во нив додадете го текно сецканото месо во мали парчиња и убаво испржете го заедно со зачините по вкус.
На крајот додадете ја боранијата, додадете го доматниот сос и вода (350мл).
Оставете вака да се вари сосот најмалку половина час, откако ќе добиете убав и погуст сос тргнете од оган.
Покријте го сосот и на крајот подгответе го оризот.
За оризот користете басмати ориз и вода во сооднос 1 спрема 2.
Повеќе детали погледнете во постот за подготовка на ориз на сириски начин.
Сервирајте во поголема чинија со оризот во средината, а сосот убаво распоредете го од страна.
Имајте добар апетит и уживајте во вкусниот нутритивен оброк!
